गीत (झर् झर् झर् झर्ना झर्‍यो...)

                      

               

                            -रुपिन्द्र प्रभावी

झर्झर् झर्झर् झर्ना झर्‍यो, दरदर दर्क्यो पानी

ओभानै छन् खेतबारी, उस्तै जिन्दगानी

 

कालो निलो मडारिन्छ बादल मनको आकास

उडाउँलाझैँ गर्छ मलाई चल्छ हुरी, बतास

न त जान्छ पानी बाहिर न घाम छिर्छ भित्र

कसले कोर्न सक्छ यस्तो भयावह चित्र

 

किनारामा मिल्किएका ढुङ्गा तानीतानी

कसले कुद्छ होला र खै बनोस् जिन्दगानी 

 

थाप्लाभरि डामैडाम छन् नाम्लो बसालेका

गालाभरि खोल्सा भीर छन् रगत खसालेका

कहाँ छ र नडामेको खाली ठाम जिउमा

सुख भन्ने छैन कतै आगो होस् कि हिउँमा

 

तिर्खा मेट्न जानिएन, छैन झुक्ने बानी

त्यसैले त ओभानै छ मेरो जिन्दगानी

 

झर्झर् झर्झर् झर्ना झर्‍यो, दरदर दर्क्यो पानी

ओभानै छन् खेतबारी, उस्तै जिन्दगानी

झर्झर् झर्झर् झर्ना झर्‍यो, दरदर दर्क्यो पानी…